થાકી ગઈ રકાબી...

બેસી ગયું ખૂણામાં જીવન કુદી કુદીને
થાકી ગઈ રકાબી અવિરત ઉડી ઉડીને

અથવા અપાર દુઃખમાં અથવા અપાર સુખમાં
ભીનો રહે છે પાલવ આંસુ લુછી લુછીને

કેવું લખાણ છે આ? ક્યા ચોકથી લખ્યું છે?
હાંફી ગયું છે ડસ્ટર એને ભૂસી ભૂસીને

હું એ જ માનવી છું વાગ્યો હતો તને જે
રેતી બની ગયો છે પત્થર તૂટી તૂટીને

જયારે હું જીવતો'તો ત્યારે હતો સિગારેટ
આખો ય પી ગયો છું ખુદને ફૂંકી ફુંકીને

- કુલદીપ કારિયા