લાગણીમાં...

એ જ છે પર્વતથી માંડી સાવ નાનકડી કણીમાં
હું જરા હદથી વધુ બોલી ગયો છું લાગણીમાં

જોડવાનું કામ કરવાનું નહીં તો વાગવાનું
એકસરખી શક્યતાઓ પ્રેમમાં ને ટાંચણીમાં

માવઠા, તું આ વખત પડતો નહીં, સોગંદ છે હો
દિકરીના લગ્ન વાવ્યા છે અમે આ વાવણીમાં

કેટલી મીઠાશથી દાઝ્યો છું હું એ કેમ કેહવું
આંગળી બોળી હતી મેં તો ઉકળતી ચાસણીમાં

ક્રુર રેતી બખ્તરોને ધીમે ધીમે પી રહી છે
યાદ સૌ ઘાયલ થઈ મરવા પડી છે છાવણીમાં

- કુલદીપ કારિયા