દ્રષ્ટિ દુકાળ થઇ ગઇ...

તારા ઉપર પડી તો દ્રષ્ટિ દુકાળ થઇ ગઇ
તડકો જરા અડ્યો તો વાચા વરાળ થઇ ગઇ

સમથળ સપાટ ધરતી ફફડી તો ઢાળ થઇ ગઇ
ઇચ્છા બધીય એમ જ તૂટેલ ડાળ થઇ ગઇ

પીધી છે જ્યુસ માફક મેં જિંદગીને કાયમ
કવિતા મળી ગઈ તો પીડા રસાળ થઇ ગઇ

એ પેટ તો ભરે છે પણ ફી ભરી શક્યો નૈ
એને તરસ મળી ગઇ, પાટી નિશાળ થઇ ગઇ

બિગબેન્ગ જેવી ઘટના ફુલમાં ઘટી ગઈ છે
બ્રહ્માંડ જેમ પ્રસરી ખુશ્બુ વિશાળ થઇ ગઇ

સપના કે ઊંઘમાંથી કોનો છે દોષ, બોલો
આંખો જરા ખૂલી તો હર ચીજ ગાળ થઇ ગઇ

કુલદીપ કારિયા